"... Mae amseroedd cyffrous o'n blaenau" Cynghorydd Carter

Yn ddiweddar, cynhaliodd y tîm Rheoli Cyrchfan yn Croeso Merthyr weithdy ymgynghori yng Nghanolfan Fusnes Orbit, gan ddod â dros 40 o randdeiliaid allweddol o'r sector twristiaeth lleol at ei gilydd. Nod y digwyddiad cydweithredol hwn oedd llunio'r Cynllun Rheoli Cyrchfan strategol ar gyfer 2025–2028, gan sicrhau dyfodol cryf a chynaliadwy i economi ymwelwyr Merthyr Tudful.

Agorodd y Cynghorydd Brent Carter, Arweinydd Cyngor Bwrdeistref Sirol Merthyr Tudful y digwyddiad, gan dynnu sylw at rôl hanfodol twristiaeth yn nhwf economaidd Merthyr Tudful. Cydnabu'r cynnydd rhyfeddol a wnaed dros y degawd diwethaf, gyda'r fwrdeistref sirol yn dod i'r amlwg fel cyrchfan twristiaeth gweithgareddau ffyniannus. Gyda thwf cryf mewn llety a niferoedd cynyddol o ymwelwyr, pwysleisiodd bwysigrwydd cydweithio parhaus rhwng busnesau, sefydliadau, a'r Awdurdod Lleol i sbarduno llwyddiant yn y dyfodol.

Yn dilyn y digwyddiad, dywedodd y Cynghorydd Carter: "Roedd yn wych gweld cymaint o fusnesau twristiaeth a lletygarwch lleol yn dod ynghyd â swyddogion y Cyngor i rannu eu barn a helpu i lunio Cynllun Rheoli Cyrchfan Merthyr Tudful ar gyfer y dyfodol. Mae amseroedd cyffrous o'n blaenau"

Trwy ddyrannu Cronfeydd Ffyniant Gyffredin, roedd Croeso Merthyr yn gallu penodi Anian Ltd a Cowshed Communication i ddod ag arbenigedd penodol i gefnogi a datblygu swyddogaethau Rheoli Cyrchfan yn y dyfodol. Drwy gydweithio, gall y rhanbarth sicrhau cysondeb, gwneud y mwyaf o gyfleoedd, a chreu profiad ymwelwyr o'r radd flaenaf sydd o fudd i drigolion a thwristiaid fel ei gilydd.

Llunio Dyfodol Twristiaeth

Yn dilyn araith y Cynghorydd Carter, darparodd Cydlynydd Rheoli Cyrchfan CBSMT drosolwg o asedau twristiaeth y sir a'r gwaith sy'n cael ei wneud gan y Tîm Cyrchfan. Cyflwynodd y 'Weledigaeth' ar gyfer Merthyr Tudful:

"Byddwn yn blaenoriaethu twf ein heconomi ymwelwyr drwy adeiladu ar ein cynnig antur unigryw, tirwedd naturiol eithriadol, a diwylliant a threftadaeth fyd-enwog."

Cyflwynwyd ystadegau allweddol a gasglwyd o'r Monitor Gweithgaredd Economaidd Twristiaeth Scarborough (STEAM)o’r rhanbarth sy'n dangos pwysigrwydd twristiaeth i'r Fwrdeistref Sirol. Dangosodd adroddiad STEAM fod effaith economaidd o £130.19m wedi ei gynhyrchu gan economi ymwelwyr Merthyr Tudful yn 2023. Mae hyn yn cefnogi dros 1170 o swyddi twristiaeth llawn amser gyda dros 1.69m o ymwelwyr dydd a dros 200,000 o ymwelwyr sy'n aros yn y Fwrdeistref Sirol.

Roedd trafodaethau'n canolbwyntio ar yr atyniadau niferus sydd ar gael yn yr ardal, o weithgareddau a phrofiadau treftadaeth o'r radd flaenaf i fanwerthu amrywiol, opsiynau bwyta, a llwybrau cerdded cysylltiedig. Gyda’r gwaith deuoli ffordd Blaenau'r Cymoedd bron wedi ei gwblhau a'r system Metro, mae Merthyr Tudful mewn sefyllfa strategol dda i groesawu hyd yn oed mwy o ymwelwyr.

Roedd y Cydlynydd Rheoli Cyrchfan hefyd yn arddangos mentrau marchnata allweddol o'r flwyddyn ddiwethaf. Roedd y rhain yn cynnwys Canllaw Ymwelwyr Ymweld â Merthyr, ymgyrchoedd Gwyllt a Chymoedd Antur Merthyr, gwelliannau i wybodaeth ymwelwyr trwy baneli gwybodaeth, arwyddion, baneri post, fideos hyrwyddo a chynnwys digidol.

Mewnwelediadau Arbenigol a Chydweithio Diwydiant

Bu Mari Stevens, Cyfarwyddwr Anian Ltd yn myfyrio ar yr egni a'r brwdfrydedd a oedd yn bresennol yn y digwyddiad: "Roedd ymdeimlad gwirioneddol o egni yng Nghanolfan Fusnes Orbit wrth i gynrychiolwyr o brif fusnesau twristiaeth a lletygarwch Merthyr Tudful ddod ynghyd i lunio dyfodol y gyrchfan.

Canolbwyntiodd y trafodaethau ar adeiladu Cynllun Rheoli Cyrchfan newydd uchelgeisiol, yn dilyn llwyddiant yr un blaenorol a lansiwyd yn 2016. Ers hynny, mae'r economi ymwelwyr wedi tyfu 35%, gan ragori ar gyfartaleddau rhanbarthol a dod yn yrrwr economaidd allweddol.

Mae'r twf hwn wedi'i ysgogi gan gydweithrediad cryf yn y sector cyhoeddus a phreifat, gan sicrhau buddsoddiad mewn atyniadau o ansawdd uchel, lletygarwch a phrofiadau awyr agored. Roedd optimistiaeth amlwg am y dyfodol, gyda gweledigaeth a rennir i wella proffil Merthyr Tudful fel cyrchfan amlwg ar gyfer diwylliant ac antur."

Datblygu strategaeth ddigidol sy'n canolbwyntio ar y dyfodol

Ymunodd Cowshed Communication, asiantaeth arobryn o Gaerdydd â'r digwyddiad i drafod datblygu strategaeth gyfathrebu ddigidol Croeso Merthyr. Roedd cyfarwyddwr eu hymgyrch, Rhian Richards, yn myfyrio ar lwyddiant y gweithdy: "Roedd yn anhygoel gweld ystafell yn llawn pobl angerddol, ymroddedig sy'n arbenigwyr yn eu meysydd. Roedd eu mewnbwn yn amhrisiadwy a bydd yn helpu i lunio sut rydym yn cyfleu stori Merthyr Tudful i Gymru, y DU, a thu hwnt."

Symud ymlaen gyda'n gilydd

Wrth i'r digwyddiad ddod i ben, gadawodd rhanddeiliaid wedi eu hysbrydoli ac yn llawn egni am ddyfodol twristiaeth ym Merthyr Tudful. Bydd y tîm Rheoli Cyrchfan yn parhau i weithio'n agos gyda rhanddeiliaid, gan roi'r wybodaeth ddiweddaraf iddynt fel y Cynllun Datblygu Strategol a'r Strategaeth Ddigidol. Gyda gweledigaeth glir a phartneriaethau cryf, mae Merthyr Tudful ar fin adeiladu ar ei lwyddiant a sefydlu ei hun fel cyrchfan flaenllaw i ymwelwyr yn Ne Cymru.